Primer Ascensu - 1943-44

La campaña 1943-44 foi una de les más importantes de la hestoria del Sporting, pos nella consiguióse, per primer vegada, l'ascensu a la División d'Honor. Yá l'anterior acabara con bones vibraciones, pos nella llegó a xugar la promoción d'ascensu contra l'Español nel Metropolitanu de Madrid. Nesti partíu, la grave mancadura del porteru Leicea, dexó llueu al equipu con diez xugadores. Ún d'ellos, Tamayo, tuvo qu'ocupar el marcu, cuidao que naquellos tiempos nun taba dexáu la sustitución del porteru.

Pa intentar de nuevu'l cambéu de categoría fichóse como entrenador a Amadeo que, como xugador, defendiera la puerta del Sporting nos años venti. La 2ª División yera entós un grupu de 14 equipos. Xubíen los dos primeros clasificaos y xugaben la promoción el terceru y el cuartu. Tres unos empiezos titubeantes, consiguióse l'oxetivu, dos jornada antes de terminar la competición, en proclamándose campeón de grupu. Con él xubió'l Murcia, que'l so delanteru centru, Alfonso, sufriera, meses antes, una grave mancadura nun choque col porteru raxón Lerín. Los dos promocionistas, Constancia y Alcoyano, nun lo consiguieron.

Los xugadores fueron homenaxaos y gasayaos pela ciudá nun autobús descubiertu, en que'l so motor figuraba la enseña del Sporting y nos lladrales los colores raxonos, onde pasiaron el troféu de campeones. Na Copa, tres la perda de concentración al llograr l'allampáu ascensu, fueron esaniciaos a les primeres de cambiu pol Arenas de Guecho.

Lerín

Andrés Lerín Bayona foi un porteru aragonés, alto y fuerte, que tuvo dos temporaes nel Sporting Nació en Jaurrieta (Navarra) el 7 d'Avientu de 1913. Procedente del Español d'Arrabalde, llegó na temporada 1932-33 al Zaragoza, y debutó esa mesma campaña en Irún. Nel club maño formó parte del equipu moteyáu "Los Alifantes" (aféresis de los Elefantes, pol so altor) y que tantes allegríes dio a la ciudá al consiguir el primer ascensu a la División d'Honor, xustamente la campaña anterior a la Guerra Civil. Ésta foi un paréntesis na so vida deportiva, pos al acabar la mesma foi inhabilitáu y non pudo incorporase de nuevu a la disciplina del Real Zaragoza hasta la 1942-43, onde namá xugó, bien cuestionáu, cuatro alcuentros. Fichó pol Sporting en Segunda División ya intervieno en 28 partíos de la 1943-44, que supunxo'l primer ascensu del club y na que pasó por un mal tragu, pos, tres un alcontrón col delanteru murcianu Alfonso, ésti sufrió una grave mancadura y hubo que toye-y la pierna. Na Categoría d'Honor allinióse en venti alcuentros de la 1944-45. Quiciabes por aquel motivu allinióse col Murcia nes dos temporaes siguientes, dende 1945 a 1947, tamién con ésitu, pos foi casi siguida la so presencia nes alliniaciones. Dempués tornó al Zaragoza, onde xugó dos campañes más, entrenó a los sos xuveniles y hasta al primer equipu nun partíu de la Copa 1967, en sacando'l so títulu nacional en 1953.

Adolfo

Adolfo García Alonso, moteyáu "L'Americanu" pol so llugar de nacencia, foi un delanteru centru, bon rematador, que xugó dos temporaes col Sporting Nació en Coronel Dorrego (Arxentina), el 3 d'Ochobre de 1915. Nes alliniaciones apaecía indiferentemente como Adolfo o Americanu. N'España, xugó na Ponferradina y nel Deportivu de la Coruña, antes de venir a Asturies. Fichó pol club raxón xixonés en siendo probáu nun amistosu a la fin de la temporada. Participó en 21 alcuentros y marcó ocho goles de la 1943-44, que felizmente terminó col primer ascensu del club a la Categoría d'Honor. En Primer División namá intervieno en seis encuentro de la 1944-45 y marcó un gol. Pasó al empar qu'el so compañeru Benín al Hércules d'Alicante, tamién de la Categoría d'Honor, onde s'allinió solo en trés partíos de la 1945-46 y tornó a la Ponferradina na 1946-47, en que la so ciudá exerció'l so oficiu de ATS. Morrió'l 24 de Mayu de 1998.

Armandín

Armando Llaneza Canga, Armandín, foi un xugador llangreanu, polivalente pola derecha, que tuvo seis temporaes nel Sporting Nació en Sama de Llangréu'l 11 d'Ochobre de 1922. El so primer equipu seriu foi'l Llangreanu (Racing de Sama), al que perteneció na temporada 1942-43 y col que quedó campeón d'España amateur. Fichó pol club raxón xixonés de Segunda División y collaboró conducentemente al ascensu del equipu nesa campaña 1943-44 pos s'allinió en 22 alcuentros y marcó trés goles. Na Categoría d'Honor del futbol español intervieno en dos partíos de la 1944-45; en 18 de la 1945-46; en diez de la 1946-47 y en 17 de la 1947-48, que supunxo'l descensu de categoría. En Segunda allinióse en seis partíos de la 1948-49. En total vistió la camiseta raxona en 75 ocasiones. Fíxolo dempués nel Pelayo de Jove, un equipu de barriu xixonés. Foi homenaxáu en Sama con un partíu ente'l Sporting y una selección asturiana, nel mes d'Agostu de 1954.

Benín

Benín Fernández Roderos foi un interior esquierda xixonés, que xugó dos temporaes col Sporting Nació en Xixón el 13 de Xineru de 1920, na zona d'Aboño. Xugó nel Palencia na 1942-43. Fichó pol club raxón xixonés de Segunda División ya intervieno n'ocho alcuentros de la campaña 1943-44 na que se consiguió l'ascensu a Primer. Na División d'Honor namá s'allinió nun partíu de la temporada 1944-45. A la fin d'ella recibió la baxa y fichó, xuntu con Adolfo l'Americanu, pol Hércules d'Alicante, tamién de primera, pero rescindió'l contratu nel mes d'Avientu en participando solo en seis encuentro. De regresu a Asturies se enroló na Cultural d'Aboño, l'equipu del so barriu, del que foi directivu y homenaxáu en 1953.

Ceballos

Fernando Ceballos Sáez, foi un defensa derechu, que la so carrera deportiva fíxola nel Santander, antes de xugar cuatro temporaes nel Sporting, con bastante ésitu Nació en Torrelavega el 9 de Noviembre de 1909. Dende 1929 a 1931 xugó na Ximnástica de Torrelavaga y dende 1931 hasta 1936, seis campañes de la Primer División, col Racing de Santander nes que'l puestu de titular na parte derecha de la defensa, siempres-y perteneció. Tres la Guerra Civil, inda s'allinió nel mesmu club na 1939-40 -na que que'l club baxó a Segunda- y nes dos siguientes. Fichó pol Sporting en Segunda División y participó en 25 alcuentros, incluyíu'l de la promoción contra l'Español, de la 1942-43 y en 27 de la 1943-44, na que se consiguió'l primer ascensu del club en tola so hestoria. Yá en Primer División intervieno en 18 partíos oficiales de la 1944-45 y en seis de la 1945-46. Terminada ésta, con 36 años, tornó a Santander, onde-y esperaba un trabayu, dempués de vistir la camiseta raxona en 76 ocasiones. Morrió en Soto de la Marina (Cantabria) el 23 de Setiembre de 1991.

Cervigón

Manuel Cervigón Cartaxena, foi un mediu esquierda, bien técnicu ya intelixente, que tuvo once temporaes nel Sporting Nació en Madrid el 14 de Setiembre de 1914. El so primer equipu, dende los quince años, foi l'Atléticu de Madrid. La temporada 1934-35 xugóla nel Coruña. Al sacar la plaza de Funcionariu de Facienda treslladóse a Huelva, onde tamién lo fixo col equipu de futbol de la ciudá. Foi destináu en 1936 a la Delegación de Xixón, pero la Guerra Civil torgó'l so progresu deportivu. A terminar ésta incorporóse al Oriamendi. Debutó nel club raxón en Segunda División y participó en 27 alcuentros de la temporada 1940-41; n'otros 27 de la 1941-42; en 27, incluyíu'l de la promoción contra l'Español, de la 1942-43 y en 26 de la 1943-44 que supunxo'l primer ascensu del club a División d'Honor. Yá en Primer División intervieno en 23 partíos de la 1944-45, (yá capitán pola retirada de Luisín); en 30 de la 1945-46; en 21 na 1946-47 y en nueve de la 1947-48, que se cerró con un descensu de categoría. Otra vegada en Segunda División, participó n'once alcuentros de la 1948-49; en nengún de la 1949-50 y en trés de la 1950-51, que terminó con un nuevu ascensu. Defendió la camiseta del Sporting en 207 ocasiones y marcó trelce tantos. En Primer División fueron 72 los alcuentros y cinco los goles. Inda como xugador n'activu, en septiembre de 1947, foi-y ufiertáu un partíu homenaxe. Tres la so retirada, entrenó al Llangreanu na 1951-52. Finó'l 12 d'Ochobre de 1995.

Chipia

Tomás Aguirre Echeveste, Chipia, foi un delanteru centru vascu que tuvo trés temporaes nel Sporting Nació en San Sebastián el 4 de Febreru de 1914. Empezó nel Vasconia, pa pasar al Real Unión de Irún. Xugó na Real Sociedá, na 1941-42 en Segunda y, tres l'ascensu, la 1942-43 en División d'Honor y que supunxo'l descensu. Ello fixo que l'equipu raxón de Segunda División afitárase nél y fichólo, per mediu del so nuevu entrenador Martín Marculeta. Intervieno en 18 alcuentros, incluyíu'l de la promoción contra l'Español, nos que marcó once goles, de la 1942-43 y en nueve de la 1943-44, que supunxo'l primer ascensu de la entidá a Primer. En División d'Honor solo allinióse nun partíu, el de la xornada 10, de la 1944-45. Depués xugó nel Ximnásticu de Tarragona (1945-46) y Logroñés (1946-47). Finó n'Ochobre de 1998.

Dindurra

José Manuel Sánchez Dindurra, Cholo Dindurra, foi un arteru estremu derechu que la so actividá deportiva empieza tres la Guerra Civil Española y foi una de la figures na hestoria del club y del fútbol español Nació en Xixón el 4 d'Abril de 1919. De neñu foi a estudiar al Colexu San Viator de Infiesto, en que'l so equipu de futbol empezó a xugar de manera destacada polo que, tres la guerra civil, foi incorporáu al Sporting col qu'intervieno siete partíos del Campeonatu Rexonal de la 1939-40. Por motivos d'estudios, treslladóse a Madrid y fichó pol primer equipu de la capital, el Real Madrid, onde xugó lo que quedaba d'esa temporada y un añu más, ensin demasiáu ésitu a causa d'una enfermedá pos namá intervieno en cuatro partíos. Tornó de nuevu al club raxón xixonés de Segunda División en Noviembre de 1941 y allinióse en 16 partíos de la 1941-42. Se enroló nel Real Uviéu de la Categoría d'Honor pa la 1942-43. Tornó al Sporting ya intervieno en 25 partíos, con cinco tantos, de la 1943-44, que supunxo'l primer ascensu a la División d'Honor del club. A partir d'entós incorporóse yá definitivamente y participó en 27 alcuentros de la 1944-45; en 16 de la 1945-46; n'otros 16 de la 1946-47 y en 28 de la 1947-48, qu'acabó col descensu de categoría. En Segunda División intervieno en 25 partíos de la 1948-49; en 29 de la 1949-50 y en 33 de la 1950-51, que supunxo un nuevu ascensu de la entidá. Na División d'Honor volvió participar en 37 de la 1951-52 y en 19 de la 1952-53. Inda n'activu, en Mayu de 1951, tributóse-y un partíu homenaxe cola presencia del Munich. Vistió la camiseta raxona en 278 ocasiones, marcó 69 goles (31 d'ellos en Primer División, ún de los cual foi'l nº100 del club) y foi el dandy del equipu, inclusive utilizaba coche particular. Sacó'l títulu d'Entrenador Rexonal en 1951 y ente otros equipu dirixió al Real Avilés na 1961-62. Finó en Xixón el 27 d'Avientu de 1971.

Domingo

Domingo García García foi un interior que, formáu nel futbol canariu, xugó trés temporaes col Sporting Nació en Santa Cruz de Tenerife el 28 d'Abril de 1916. Ente 1941 y 1944, xugó col Atléticu Aviación (dempués llamáu Atléticu de Madrid) en Primer División, con un participación notable. Llegó a Xixón a finales de la temporada 1943-44, col fin de reforzar al club raxón -daqué relaxáu tres el so ascensu de categoría díes antes- nel partíu de vuelta de la Copa contra l'Arenas de Guecho, al que nun se consiguió esaniciar. Asitióse nel equipu ya intervieno en 22 partíos oficiales na 1944-45 y en 19 na 1945-46 y marcó siete goles en caúna d'elles. En dambes pasó por un mal trance, na primera la frayadura de los lligamentos cruciaos y na segunda, la muerte de la so esposa, lo que-y torgó actuar en dalgún partíu más. Na campaña 1946-47 yá perteneció al so equipu rival, el Real Uviéu, onde inda permaneció trés años más hasta 1950.

Gundemaro

Gundemaro Paniceres García, foi un interior derechu que, procedente de la cantera, permaneció cinco campañes nel Sporting y cupió-y l'honor de ser l'autor del primer gol del club en Primer División Nació en Xixón el 4 de Julio de 1919. El so primer equipu seriu foi'l Deportivu Oriamendi xixonés, onde xugó la temporada 1940-41 y dexólo al club raxón a la fin d'ella pa xugar un amistosu en Bilbao. Fichó pol Sporting en Segunda División y participó en 26 alcuentros, con trelce dianes, de la 1941-42; n'once, con trés goles, de la 1942-43 y en 22, con dolce tantos, na 1943-44, que supunxo l'ascensu del equipu raxón a Primer División. Na Categoría d'Honor intervieno en cinco partíos de la 1944-45 y marcó dos goles, ún de los cual, el que fixo frente al Coruña, pasó a la hestoria por ser el primeru del Sporting en Primer División y en dos de la 1945-46, na que marcó un gol al Valencia. Depués xugó'l Málaga (1946-47) y Lleonesa (1947-48).

Liz

Camilo Liz Salgado foi un estremu esquierda rápidu y con muncha picardía, qu'actuó cuatro campañes nel Sporting, anque a lo llargo de la so vida deportiva, non yá como futbolista activu, trió munchos clubes españoles. Foi un especialista en marcar goles directos dende'l córner Nació n'Ourense'l 17 de marzu de 1913. Antes de la guerra civil perteneció al Burgas d'Ourense, Lemos (1935-36), onde yá formó nala con Bachiller y Celta de Vigo. Cuando se volver a entamar les competiciones tres la Guerra Civil, fichó pol Mirandilla de Cádiz (depués Cádiz C.F.). Coló na campaña 1940-41 al Recreativu de Granada, col que xubió a Primer División y debutó con ésitu nella na 1941-42. Fichó pol club raxón xixonés de Segunda Divisón, xuntu col so compañeru de nala Bachiller ya intervieno en 21 partíos, incluyíu'l de la promoción contra l'Español, de la 1942-43, amás de faese cargu como entrenador del equipu nos últimos estertores de la temporada y en 24 de la 1943-44, que supunxo'l primer ascensu del club a la División d'Honor. En Primer, participó en 28 alcuentros de la 1944-45 y en diez de la 1945-46. Causó baxa al acabar la temporada y xugó col Cádiz na 1946-47, tres la cual dio fin a la so carrera como xugador. Foi entrenador del Cádiz (1948-49 y 1951-52), Tetuán, Ceuta y Lugo. Remató la so actividá deportiva como Secretariu Técnicu del Castellón mientres catorce años -onde se crució col so vieyu Sporting nel Tornéu de Palma- del Xerez y del Cádiz, onde se quedó a vivir tres la so xubilación.

Luisín

Luis Menéndez Álvarez, Luisín, foi un mediu, seguro y de pequeña estatura, que xugó 14 temporaes nel Sporting, antes y dempués de la Guerra Civil Nació en Xixón el 17 d'Ochobre de 1911. Dos de los sos sobrinos tamién vistieron la elástica sportinguista: Bustu y Miranda. De primeres foi conocíu como Menéndez II. Empezó nel Deportivu Arenal, d'ellí pasó al Somió y fichó poe el club raxón xixonés de Segunda División. Intervieno en trés partíos de la campaña 1929-30; en 14 de la 1930-31; en 21 de la 1931-32; en 28 de la 1932-33; en 27 de la 1933-34; en 22 de la 1934-35 y en 34 de la 1935-36. Tres el paréntesis causáu pola Guerra Civil, volvió incorporase al Sporting y participó en 26 alcuentros de la 1939-40; en 16 de la 1940-41; n'otros 26 de la 1941-42; n'once de la 1942-43 y en cuatro de la 1943-44, que concluyó col primer ascensu del club a la División d'Honor y cola so retirada. Entamóse-y en septiembre de 1944 un partíu homenaxe nel Molinón, dempués de vistir la camiseta raxona en 222 ocasiones. Al añu siguiente foi l'entrenador del Deportivu Xixonés y siguió venceyáu en xeres técniques col club de tola so vida con llabores de ojeador y entrenador, inclusive del primer equipu na 1951-52, la 1953-54 y la 1958-59. Trabayó na Hidroeléctrica del Cantábricu y finó en Xixón el 31 d'Avientu de 1988

Mijares

José Gutiérrez Mijares, foi un delanteru centru de gran facilidá goliadora que tuvo cuatro temporaes nel Sporting, al empiezu de la so etapa deportiva Nació en Lluanco'l 16 de Marzu de 1920. Antes de la Guerra Civil, xugó nel equipu del so pueblu, el Marín. Tres ella, el so primer equipu federáu foi'l Stadium Avilesín, col que quedó campeón d'España d'aficionaos na temporada 1939-40. Fichó pol club raxón xixonés en Segunda División antes de rematar la campaña 1940-41 y allinióse nos cuatro postreros partíos de Copa. Intervieno en 24 alcuentros, con 25 goles, de la 1941-42; en venti, con once dianes, de la 1942-43 y nún de la 1943-44, que supunxo'l primer ascensu del Sporting a la División d'Honor. Depués xugó nel Valladolid (1944-45), Real Avilés (1945), Deportivu de La Coruña (1945-46), Mallorca (1946-49), Lleida (1949-50), Torrelavega (1950-51) y otra vegada Mallorca (1951-52). Tornó a Asturies onde entrenó al Avilés y a los conxuntos xixoneses del Pelayo y Calzada. Tamién foi presidente del Colexu d'Entrenadores d'Asturies, del Club Natación Cimadevilla, de la Federación Asturiana de Remu, conceyal del Conceyu de Xixón y formó parte de la directiva del Sporting con Méndez Cuervu como Presidente. Finó'l 7 de Febreru de 1989.

Paladini

Higinio Fernández Fernández, Paladini, foi un interior derecha llangreanu que xugó dos temporaes nel Sporting Nació en Llangréu'l 28 d'Abril de 1916. Yera cuñáu de Luis Sión (Sión III), pos ésti casóse cola so hermana. Dende antes de la Guerra Civil hasta la temporada 1940-41 xugó nel Racing de Sama, conocíu tamién como'l Llangreanu. Fichó pol club raxón xixonés de Segunda División ya intervieno en 14 partíos, incluyíu'l de la promoción contra l'Español, con seis goles, de la 1942-43 y en cinco, con un gol, de la 1943-44, qu'acabó col primer ascensu de la hestoria del club a Primer y na qu'al poco d'empezar la temporada foi operáu de la frayadura del tabique nasal y tuvo bastante tiempu nel dique secu. Foi trespasáu al Valladolid n'Ochobre de 1944 y allinióse de nuevu nel Llangreanu mientres la 1947-48 y onde permaneció hasta la so retirada. Finó en Sama el 19 de Febreru del 2002.

Sansón

Francisco Baos Rodríguez, Sansón, ostenta'l títulu de ser el xugador más mozu en debutar na lliga española. Tenía una gran fortaleza física y la so polivalencia dexába-y actuar por tol campu, salvu como porteru. Xugó dos temporaes col Sporting, anque la etapa más importante de el so vida deportiva pasóla nel Real Uviéu. Nació en Vigo, nel barriu de Lavadores, el 20 d'Abril de 1924. Les sos primeres pataes dioles nel Vigués y debutó -con quince año y 255 díes- en Primer División na temporada 1939-40 col Celta. Tantu nesa como na siguiente namá apuesto trés partíos, polo que, buscando minutos, fichó pola Cultural Lleonesa acabante xubir a la Segunda División. Nesti equipu permaneció hasta que lo fixo pol club raxón xixonés, tamién na Categoría de plata. Allinióse en 16 alcuentros de la temporada 1943-44, que supunxo'l primer ascensu del club a la División d'Honor y yá en Primer, en seis de la 1944-45. Pasó al Real Uviéu onde xugó consecutivamente cinco temporaes en Primer, dende 1945 hasta 1950. Fueron les meyores de la so vida deportiva, pos en toes elles allinióse en más de venti partíos. Tres el descensu del Uviéu, na 1950-51, tornó al Celta de Vigo, completando la so vida deportiva en Primer, con cinco temporaes más. Inda en Segunda División intervieno col Xerez na 1955-56, terminada la cual retiróse con 32 años. Retiráu del futbol moró en Vigo.

Sión III

Luis Sión Mortera, Sión III, foi defensa que tuvo siete campañes de la década de los cuarenta nel Sporting y formó parte del equipu que consiguió'l so primer ascensu. Nació en Sama de Llangréu'l 12 de Julio de 1917. Los sos dos hermanos mayores, Floro y José (Sión II), fueron tamién futbolistes del Sporting, colos que coincidió nel Racing Llangreanu, antes de fichar pol equipu xixonés. Casóse con una hermana de Paladini. Debutó nel equipu xixonés de Segunda División ya intervieno en 26 partíos de la temporada 1941-42; en 25, incluyíu'l de la promoción contra l'Español, de la 1942-43 y en 28 de la 1943-44 que supunxo'l primer ascensu del club a Primer División. Yá nesta División d'Honor, participó en 28 alcuentros de la 1944-45; en siete de la 1945-46; en diez de la 1946-47 y en cinco de la 1947-48, la de la so despidida, con descensu a Segunda. En total vistió la camiseta raxona en 129 ocasiones, 50 d'elles en Primer División. Sacó'l títulu d'Entrenador Rexonal en 1951 y darréu fíxose cargu de La Felguera, con un partíu homenaxe frente al Sporting n'Agostu de 1951. Finó en Xixón el 23 d'Avientu del 2001.

Tamayo

Mauro Álvarez Álvarez, Tamayo, foi un xugador defensivu, rápido y bon marcador, que tuvo quince temporaes nel Sporting y que tola so vida posterior va quedar amestada al club Nació en Xixón el 21 d'Avientu de 1918. Les sos primeres pataes dioles nel Racing del Llanu y nel Xovellanos. Na primer campaña tres la Guerra Civil xugó nel Hispania, mientres la cual foi llamáu pol Sporting pa participar nuna serie de partíos amistosos. Fichó pol club raxón xixonés de Segunda División. Empezó como mediu derechu pero na temporada 1949-50 pasó a defensa del mesmu llau. Intervieno en 27 partíos de la temporada 1940-41; en 23 de la temporada 1941-42; en 22 de la 1942-43, na que tuvo qu'actuar munchos minutos como porteru, por mancadura de Leicea, nel partíu de promoción contra l'Español y en 24 de la 1943-44, que supunxo l'ascensu del club a Primer División. Na Categoría d'Honor participó en 25 alcuentros de la 1944-45; n'otros 25 de la 1945-46; en 21 de la 1946-47 y en 27 de la 1947-48 qu'acabó con un descensu. Otra vegada en Segunda intervieno en 17 partíos de la 1948-49; en 22 de la 1949-50 y en 32 de la 1950-51 que terminó n'ascensu. Yá de nuevu en Primer, participó en 22 alcuentros de la 1951-52; en 26 de la 1952-53 y en 16 de la 1953-54 na que se volvió a baxar. Inda xugó en Segunda ya intervieno en cuatro partíos de la 1954-55. En total vistió la camiseta raxona en 333 ocasiones y marcó cinco goles. Pasó entós a ocupar cargos aidares nel equipu, como masaxista, encargáu del material y otros puestos alministrativos hasta la so xubilación en 1978. Finó'l 3 de Xineru de 1994.

Victorero

Enrique Victorero Ordieres, foi un defensa esquierdu de la cantera que tuvo cinco campañes nel Sporting Nació en Villaviciosa'l 29 d'Avientu de 1923. Empezó nel Mocedá, nel equipu xixonés del Hispania y nel Llangreanu, namá unos meses pa reforzalo nel tornéu de clasificación de la temporada 1941-42. A la fin d'esta mesma campaña pasó al primer equipu raxón de Segunda División pa xugar trés alcuentros de Copa. Intervieno en cuatro partíos de la 1942-43 y nún namá de la 1943-44, que supunxo'l primer ascensu del equipu, pos, casi al rematar, tuvo que cumplir el serviciu militar en Ceuta, polo que xugó nel club d'esta localidá hasta 1946. A la terminación de los sos deberes cola patria, reincorporóse al Sporting, yá en Primer División ya intervieno en doce encuentro de la temporada 1946-47. Con contratu a valir foi vencíu al Torrelavega na 1947-48, dempués de lo que causó baxa y se enroló nel Murcia (1948-49) onde foi'l so entrenador Amadeo. Nun hai que confundilo con Alfonso Victorero que xugó nel Real Uviéu dende 1940 al 43.

Vitín

Víctor González García, Vitín, foi un defensa esquierdu de la cantera, que tuvo seis temporaes nel Sporting Nació en Xixón el 17 de Marzu de 1923. El so primer equipu de cierta importancia foi'l xixonés Hispania. Fichó pol club raxón en Segunda División y allinióse en trés alcuentros de la campaña 1943-44, la del primer ascensu del equipu a la Primer División. Na División d'Honor intervieno en dos partíos de 1944-45; en trés de la 1945-46; en 18 de la 1946-47 y en 19 de la 1947-48 que terminó con un descensu de categoría. La so última temporada col Sporting foi en Segunda y participó en trés alcuentros de la 1948-49. Nesos seis años namá vistió la camiseta raxona en 48 ocasiones. Depués xugó nel Deportivu Alavés y nel Recreativu d'Huelva y tornó a Asturies pa xugar dalgún alcuentru col Calzada.