Ayuda Enciclopedia

TEMPORADA 1926-27

Manolo Meana, que s'atopaba mancáu de llarga duración foi'l que se fixo cargu como entrenador del equipu. El campeonatu rexonal foi un paséu pal club, pos abondaron les victories por goliada, dalguna hasta d'once tantos. De xacíu llogróse'l primer puestu nuna llarga lliga na que s'enfrentó a los equipos xixoneses del Fortuna, Cimadevilla, Unión Deportiva Racing y Real Athletic del Llanu; al Real Uviéu, qu'esi añu fundárase tres la fusión del Real Stadium Uvieín y el Deportivu Uviéu; al Real Stadium Avilesín, y al Racing Llangreanu de Sama. El Sporting marcó 75 goles y xuntu col Fortuna, subcampeón, clasificóse pa la Copa d'España. Amiyó a la segunda categoría rexonal el postreru clasificáu, el Athletic, al perder la promoción col Racing de Mieres. Na Copa d'España foi incluyíu nun grupu previu col Coruña, Valladolid y Racing de Santander. Tamién se clasificó en primer llugar y pasó a cuartos de final, onde-y tocó'l Real Unión de Irún. Cada equipu ganó un partíu y tuvo qu'allegase a un desempate en Santander, previu al cual, los xugadores xixoneses tuvieron concentraos tola selmana en Cuadonga. L'alcuentru tuvo precedíu d'una gran espectación pos inclusive se botó un barcu, El Tambre, pa movese los siguidores asturianos. L'equipu quedó esaniciáu pol que la postre sería'l campeón d'España, al perder por trés a unu.

Armando

Armando Álvarez Viñes foi un porteru de la cantera que permaneció nel club cinco temporaes. Ingresó nel Sporting na temporada 1924-25, pero foi na viniente cuando debutó, al intervenir nun solu partíu en 1925-26. Tres la retirada del gran Amadeo, abriéronse-y les puertes de la titularidá, formando parte del equipu n'ocho alcuentros en 1926-27; nel mesmu númberu d'ellos en 1927-28 y en cuatro alcuentros mientres la 1928-29, primer de la Lliga, en Segunda División. Pasó dempués a defender los colores del Club Xixón, onde xugó como cancerbero titular inda trés años más.

Picú

José María González, “Picú”, foi un porteru local que xugó intermitentemente nel Sporting. Empezó a parar balones nel Hispania y de ende pasó al Unión Deportivu Racing de Xixón, na campaña 1923-24, y al Fortuna de Ceares, en 1925-26. Fichó pol club raxón xixonés y namá s'allinió nun partíu del Campeonatu Rexonal en 1926-27. Tornó al Unión Deportivu Racing en 1927-28. Volvió reincorporase al Sporting, yá definida'l so allugamientu en Segunda División, ya intervieno en dos alcuentros oficiales en 1929-30. Xugó na Cultural Lleonesa en 1930-31. Yá veteranu, y tres el so pasu pol Cantábricu, echóse mano d'él por cuenta de la mancadura de Floro Sión en 1935-36, pero nun tuvo necesidá de debutar y se -y dió la baxa.

Adolfo

Adolfo Suárez Morán foi un rápidu estremu derechu xixonés, con bon tiru, que-y cupió l'honor de ser el segundu internacional de la entidá. Nació en Xixón el 28 d'Avientu de 1908. Foi moteyáu como “El Neñu”. Hermanu d'Arcadio, otru destacáu xugador sportinguista col que coincidió nes alliniaciones. Empezó nel Olimpia, conxuntu filial del club raxón, incorporóse a la primer plantiya en trés partíos de la temporada 1926-27 y marcó un gol. Convirtióse n'unu de los “xugadores taxis” del Campeonatu de la Copa d'España en 1927-28: entrenaba y faía la so vida en Xixón, y movíase les fin de selmana pa xugar col Atléticu de Madrid. De toes formes, col Sporting xugó diez partíos de la inacabada Lliga Maximalista nos que marcó ocho goles. Col empiezu de la Lliga oficial el Sporting foi incluyíu na Segunda División ya intervieno en 23 partíos, incluyíu'l de la eliminatoria previa, con nueve dianes, en 1928-29; en 15, con seis goles, en 1928-29; en 23, con dieciséis goles, en 1930-31; en 31, con catorce tantos, en 1931-32 y en dos, con trés goles, en 1932-33. volvió reincorporase na temporada 1934-35 na que s'allinió en cuatro partíos. En total vistió la camiseta raxona en 100 ocasiones y marcó 57 goles. Foi internacional nun partíu contra Italia celebráu en Xixón en 1928. Finó en 1968.

Argüelles

Manuel Argüelles Sánchez foi un menudu y rápidu estremu esquierda xixonés que xugó como titular munchos años de la década de los venti. Ocupa'l tercer llugar, tres Corsino y Pin, de la llista de los xugadores qu'intervinieron en más partíos del Campeonatu Rexonal col equipu. Nació en 1893. Hermanu de Víctor y primu de Joaquín, que tamién xugaron nel club raxón. Empezó na Sportiva, incorporóse al Sporting en 1913, con 16 años, y puestu convirtióse nuna de les figures del equipu. Intervieno nos dos primeros partíos oficiales que xugó l'equipu na temporada 1916-17; n'unu en 1917-18; en cuatro en 1918-19; en cinco en 1919-20; en seis en 1920-21; en diez en 1921-22; en dolce en 1922-23; en trelce en 1923-24; en diez en 1924-25; en diecinueve en 1925-26, na que, amás, foi'l so entrenador, y en 21 en 1926-27. Foi esbilláu en 1920 pa participar nos Xuegos Olímpicos d'Amberes, pero nun llegó a dir al abandonar voluntariamente la concentración en Bilbao pa tornar a Asturies. Formó parte del equipu d'Asturies que ganó en 1922 la Copa del Príncipe. A lo llargo de la so vida deportiva, refugó proposiciones d'otros equipu españoles que queríen incorporalo a les sos files. En Mayu de 1925 foi-y entamáu una llacuada homenaxe pola so dedicación al club. Retiróse al rematar la temporada 1926-27, en siendo nes dos postreres el capitán del equipu, según entrenador eventual. Col Sporting participó en 103 alcuentros oficiales, munchos pa los que se xugaben naquellos tiempos, pero, sicasí, namá marcó trelce goles. Foi'l fundador del restorán xixonés Casa Argüelles. Finó en Xixón el 10 d'avientu de 1958.

Bango

Baldomero Bango García foi un xugador de banda derecha, de llargu percorríu, que formó al par de Meana y Corsino una de les meyores medies d'España al empiezu de los años venti. Ocupa'l quintu llugar, tres Corsino, Pin, Argüelles y Domingo, de la llista de los xugadores qu'intervinieron en más partíos del Campeonatu Rexonal col equipu. Nació en Xixón el 15 de Febreru de 1901. Empezó nos equipos xixoneses del Hispania, Unión Deportiva Racing ya incorporóse al club raxón xixonés. Intervieno en seis partíos de la campaña 1919-20; en nueve en 1920-21 y en trelce en 1921-22, tres la cual, tornó al Racing en 1922-23. A la viniente, yá taba de nuevu nel Sporting, onde xugó de manera ininterrumpida hasta 1928. Participó n'otros trelce alcuentros de la campaña 1923-24; en cuatro en 1924-25; en 17 en 1925-26; en 18 en 1926-27 y en siete de la Lliga Maximalista en 1927-28. Terminada ésta, dexó'l fútbol por tener un empléu nel Bancu Español de Creitu. Vistió la camiseta raxona en 89 ocasiones y marcó venti goles, dalgunos d'ellos, de penalty. Pola federación Ástur-Montañesa, foi-y otorgada la Medaya del Méritu Deportivu en 1945. Finó'l 5 de noviembre de 1976.

Corsino

Corsino Menéndez Solar foi un xugador pela banda esquierda, bon marcador, potente y combativu, que formó al par de Meana y Bango una de les meyores medies d'España, al empiezu de los años venti. Foi'l xugador que más vegaes intervieno col club en partíos del Campeonatu Rexonal. Nació en Xixón, el 7 de Xineru de 1903. Les sos primeres pataes dioles nos equipos del Fortuna y del Shooting. Incorporóse al club raxón xixonés y aína fíxose insustituible como mediu esquierdu en toles alliniaciones del equipu. Intervieno en seis partíos de la campaña 1919-20; en siete en 1920-21; en trelce en 1921-22; en quince en 1922-23; n'once en 1923-24; en diez en 1924-25; en 18 en 1925-26 y en 22 en 1926-27. Formó parte del equipu d'Asturies que ganó en 1922 la Copa del Príncipe y foi convocáu en 1923 y 1924 pa xugar dos talos partíos internacionales contra Francia y Portugal, pero dambos violos dende'l banquín. Al empiezu de la temporada 1927-28, sufrió una grave mancadura que lu caltuvo estremáu de los campos de fútbol, polo que pasó a entrenar a la plantiya mientres se recuperaba. Inda xugó trés alcuentros na 1928-29, ente ellos, el de la eliminatoria previa de la Lliga, qu'encuadró al Sporting en Segunda, pero yá ensin la chispa que tenía, lo que-y obligó a retirase. Vistiera la camiseta raxona nada menos que en 95 partíos. Foi-y otorgada la Medaya al Méritu Deportivu pola Federación Asturiana de Fútbol en 1935. Rexentó en Xixón un restorán y fonda na cai Begoña, que foi la residencia de munchos xugadores foranos que llegaron al equipu.

Cuesta

Corsino Cuesta Priendes foi un defensa que xugó mientres cinco temporaes siguíes nel Sporting. Dende la temporada del so debú hasta la de la so retirada foi un fixu nes alliniaciones del club raxón xixonés. En total participó en 63 alcuentros: en 17 en 1925-26; en diez en 1926-27; n'once en 1927-28; en 22, incluyíu'l de la eliminatoria previa de la Lliga, en 1928-29 y en nueve en 1929-30. Nésta última, tuvo una ficha añal de 2.250 pesetes. Fichó pol equipu madrilanu del Nacional, del barriu de Chamberí, en temporada 1932-33 y, terminada la mesma, tornó a Asturies y se recalificó como amateur.

Dominguín

Domingo González Villa, Dominguín, foi un estremu derecha bien artera, que xugó como titular dellos años na década de los venti. Ocupa'l cuartu llugar, tres Corsino, Pin y Argüelles, de la llista de los xugadores qu'intervinieron en más partíos del Campeonatu Rexonal col equipu. Nació en 1901. El so primer equipu foi'l Santa Lucía infantil, pasando al Sporting en 1917. Un añu dempués, debutó ya intervieno nos cinco partíos oficiales que se xugaron a lo llargo de la temporada 1918-19, y dende entós fíxose l'amu de la banda derecha hasta que se retiró del fútbol. Participó en cuatro alcuentros en 1919-20; en diez en 1920-21 y en nueve en 1921-22. Nun xugó mientres la temporada 1922-23 porque foi destináu a la Guerra de Marruecos, formando parte del Batallón Tarragona. Al so regresu, volvió reincorporase al club y la so presencia foi en quince partíos en 1923-24; en cinco en 1924-25; en diez en 1925-26; en 22 en 1926-27; n'unu na 1927-28 y en dolce en 1928-29 -la d'empiezu de la Lliga oficial- na que, como capitán del equipu, tamién foi'l so eventual entrenador. En total, vistió la camiseta raxona en 93 ocasiones y marcó 18 goles, ocho d'ellos en 1926-27. Foi-y concedida la Medaya al Méritu Deportivu Rexonal en 1933 y morrió en Xixón el 9 d'Ochobre de 1940.

Herrera

Ramón Herrera Bonu foi un destacáu delanteru centru, arteru, de tiru potente y bon remate de cabeza. Terceru , tres Quini y Pin, na llista de los goliadores del club en tola so hestoria. Nació en Xixón, el 13 d'Abril de 1907. Xuntu col so hermanu “Herrerita”, marcaron una etapa nel fútbol asturianu. Xugó nel Atléticu d'El Llanu, onde destacó de manera notable. Tanto ye así que al ser incorporáu al club raxón xixonés, fíxose darréu col puestu de delanteru centru ya intervieno en 19 partíos de la campaña 1925-26 na que marcó 18 goles, en diez en 1926-27, con 19 goles. Fichó pol Atléticu de Madrid en 1927-28, onde'l famosu cronista Rienzi moteyó-y El Sabiu”. Ellí tuvo problemes de salú y foi vencíu al Betis tres la so recuperación. Fichó de nuevu pol Sporting, en Segunda División, y namá intervieno en trés alcuentros en 1930-31. Nes vinientes yá la so presencia foi más asidua: allinióse en 24 partíos, con 26 dianes, en 1931-32; en 26, con 38 goles, en 1932-33; en 28 partíos, con 26 goles, en 1933-34, na qu'amás foi entrenador, y en trés alcuentros, con trés dianes, en 1934-35, mientres la cual, nel mes de Xineru, el club dio-y un permisu pa reponese. En total vistió la camiseta raxona en 118 ocasiones y marcó 141 goles. Tres la Guerra Civil, foi a Rusia cola División Azul. Al so regresu vivió en Barcelona mientres dellos años, emplegáu nuna compañía eléctrica, hasta que volvió a Xixón pa trabayar nes oficines d'una naviera. Entamóse-y un partíu homenaxe n'El Molinón, n'Ochobre de 1950. Finó en Xixón, el 4 d'Ochobre de 1960, por cuenta de una intoxicación de pastillas.

Lloreo

José Antonio Álvarez Lloreo foi un interior derecha, de pequeñu tamañu, pero gran fuerza, qu'actuó dos campañes col Sporting, anque lo meyor de la so carrera deportiva desenvolvióla, darréu, en Santander. Nació en Xixón, el 26 de Noviembre de 1906. Les sos primeres pataes dioles nel equipu infantil del Contracay, d'onde pasó, na campaña 1924-25, al Athletic del Llanu al par de Ramón Herrera, Captáu pol club raxón xixonés, foi vencíu al Cimadevilla en 1925-26. Se reintegró definitivamente al Sporting ya intervieno en 21 alcuentros en 1926-27 y en seis en 1927-28. Por cuenta de la suspensión federativa del Sporting, colóse al Racing de Santander, en Primer División, n'Avientu. Ellí xugó, con ficha profesional, dende 1928 a 1934 y participó en 86 alcuentros. Finó en Santander a los 27 años d'un colapsu, el 21 de Febreru de 1934, quince díes antes de terminar la Lliga. Foi'l dolorosu contraste deportivu pa una afición que, esa temporada, vio ocupar al so equipu, el tercer puestu de la Primer División española.

Menéndez

Luis Menéndez Menéndez foi un mediu centru, bien lluchador, de pequeña estatura, pero que diba bien por altu. Xugó cinco temporaes siguíes nel Sporting. Yera moteyáu “El Barrosu”, porque nos partíos d'agua siempres terminaba envolubráu en folla, de los pies a la cabeza. El so primer equipu foi'l Hispania d'El Llanu y dellí pasó al Unión Deportivu Racing de Xixón, onde xugó de mediu esquierda. Foi probáu pol Sporting nuna escursión a Galicia, con resultáu satisfactoriu. Intervieno en nueve alcuentros de la temporada 1924-25, toos menos unu de los celebraos; en quince en 1925-26; en 18 en 1926-27; en seis en 1927-28 y n'unu en 1928-29, na que'l club raxón xixonés cola creación de la Lliga, foi encuadráu en Segunda División. Tres la so retirada entró a trabayar na Fábrica de Moreda.

Morilla

Eduardo Morilla Ponga foi un impetuosu futbolista de vanguardia, interior o delanteru centru, con facilidá de gol, que tuvo frecuentes apaiciones nes alliniaciones de los años venti. Fichó pol club raxón xixonés ya intervieno en cuatro partíos de la campaña 1921-22; n'once en 1922-23; en seis en 1923-24 y en nueve en 1924-25. Alternóse con Arcadio como interior derechu, na primer y con Trapote como delanteru centru, nes otres trés. Cola llegada de Ramón Herrera volvió retomar les funciones d'interior y participó en 16 alcuentros en 1925-26 y en diez en 1926-27. Vistió la camiseta raxona en 56 ocasiones y marcó 44 goles. Coló al Celta de Vigo, onde siguió dando amueses del so olfatu de gol, na temporada 1927-28 y emigró a Bonos Aires en 1929, nel transatlántico “Madrid”. Entrenó al Puebla de Méxicu en 1944, y nesta ciudá morrió, d'una dolencia hepática, el 6 de Xunu de 1961.

Pachu

Francisco García, “Pachu” o “Pachín”, foi un estremu derechu que xugó siete temporaes consecutives nel Sporting. Formóse nes categoríes inferiores del club raxón xixonés. Intervieno en nueve partíos de la campaña 1924-25; en diez en 1925-26; en dos en 1926-27; en siete de la inacabada Lliga Maximalista 1927-28; en trés en 1928-29, na que'l Sporting foi incluyíu na Segunda División de la recién creada Lliga; en ventitrés en 1929-30 y en cinco en 1930-31. Vistió la camiseta raxona en 59 ocasiones y marcó quince tantos.

Pena

Pedro Pena Ponga, “Perico Pena”, foi un defensa seguru y con clase, que desenvolvió casi tola so actividá deportiva n'Asturies, sacantes l'añu que, de manera un tanto orixinal, foi vencíu al Atléticu de Madrid. Nació en Xixón, el 29 d'Ochobre de 1910. Debutó col equipu raxón al poco de cumplir los quince años. Intervieno en siete alcuentros en 1925-26 y en dos en 1926-27. Na temporada 1927-28, al Sporting, que caltuvo fuertes enfrentamientos cola Federación Asturiana y la Nacional, prohibióse-y la so participación nos campeonatos. Por ello, xuntu con Tronchín y Adolfo, foi vencíu al Atléticu de Madrid, nuna operación llamada de los “xugadores taxis”: entrenaben y faíen la so vida en Xixón y movíense les fin de selmana pa xugar col equipu de la capital d'España. De toes formes allinióse col Sporting n'once partíos de la inacabada Lliga Maximalista. Participó en 19 alcuentros na 1928-29, incluyíu'l de la perdida eliminatoria previa qu'encuadró al club en Segunda División de la nueva Lliga; en catorce en 1929-30; en 26 en 1930-31; en 32 en 1931-32; en 25 en 1932-33 y en 28 en 1933-34. Fichó pol Real Uviéu, en Primer División, y formó parte, ente 1934 y 1947, de les alliniaciones que llevaron el club a llograr los puestos más altos de la so hestoria. Salvu nes dos postreres, foi titular indiscutible y xugó más de venti partíos en toes elles. Foi vencíu una temporada al Sporting, la primer campaña tres la Guerra Civil, al nun poder participar el club por tener el Buenavista destruyíu y allinióse en 26 alcuentros en 1939-40. Nota interesada ye que, a pesar de ser un gran xugador, nun marcó nengún gol nos partíos qu'intervieno de la Primer División de Lliga. Vistió la camiseta raxona en 179 ocasiones y marcó cinco goles. Recibió un homenaxe en Buenavista, ente l'Uviéu y una selección de xugadores en septiembre de 1946. Foi entrenador del Caudal de Mieres en 1947. A partir de la so retirada de dedicó al billar, aportando a presidente de la Federación Asturiana. Foi-y otorgada la medaya al Méritu Deportivu Rexonal en 1958. Morrió en 3 de Xineru de 1989.

Pin

José Ordieres Cuesta, “Pín”, foi un interior derechu de pequeña estatura, con bon regate y muncho gol, que marcó un finxu na hestoria del Sporting en permaneciendo quince temporaes nel club. Ocupa'l segundu llugar de la llista de los xugadores qu'intervinieron en más partíos del Campeonatu Rexonal col equipu, el máximu goliador nesta competición, y tamién, tres Quini, el segundu en tola hestoria del club. Nació en Xixón, en 1909. Empezó nel Litting de La Guía, pero con quince años yá foi ficháu pol Sporting. Intervieno en 22 partíos de la campaña 1926-27 y marcó 36 goles y en diez, con nueve goles, en 1927-28. Foi llamáu pol seleccionador nacional pa xugar contra Italia, pero tornó la invitación por atopase xugando col so equipu en Paris. Col empiezu de la Lliga en Segunda División participó en 26 alcuentros, incluyíu'l de la eliminatoria previa, con quince tantos, en 1928-29; en 23, con catorce dianes, en 1929-30; en 25, con 18 tantos, en 1930-31; en 23, con 17 goles, de la 1931-32; en 24, con catorce tantos, en 1932-33; en 25, con diez dianes, en 1933-34; en 23, con nueve goles, en 1934-35 y en 38, con 22 tantos, en 1935-36 na que se-y homenaxó con un partíu contra l'Uviéu. La Guerra Civil supunxo un paréntesis de la so actividá deportiva. Terminada la mesma, inda permaneció otros cuatro años nel club y retiróse en sufriendo una grave mancadura. Participó en 22 alcuentros, con once goles, en 1939-40; en siete, con dos dianes, en 1940-41; en 17, con cinco tantos, en 1941-42 y en trés, con un gol, en 1942-43. Una grave mancadura con québrala del maleolo en Xineru de 1941, anunció la so retirada. En total vistió la camiseta raxona en 288 ocasiones y marcó 183 tantos, lo que-y asitien el segundu de los goliadores de la hestoria del equipu, tres Quini. Tres la so retirada, en septiembre de 1943, foi de nuevu homenaxáu n'El Molinón nun partíu ente'l Sporting y una selección nacional. Foi-y concedida la medaya del Méritu Deportivu Rexonal en 1951.

Prida

Enrique Prida Maya foi un defensa esquierdu local que xugó trés campañes nel Sporting. Formóse nel Real Athetic del Llanu, onde xugó la última temporada antes d'incorporase al club raxón xixonés. Allinióse en 21 partíos en 1926-27. Al empiezu de la viniente, foi suspendíu por duplicidad de ficha col Athletic y el Sporting. Resolvióse'l litigió y quedó adscritu a esti postreru nel qu'intervieno en seis alcuentros en 1927-28 y en siete en 1928-29, dos d'ellos de la recién creada Lliga, en Segunda División. Como interés, nun partíu contra'l Real Uviéu, apostó parte del alcuentru como porteru, una y bones Picú fuera espulsáu.

Quirós (Armando)

Armando Quirós Álvarez foi un defensa derechu, más técnicu que potente, que xugó nueve temporaes nel Sporting, formando con Floro Sión y Pena, una de les meyores defenses de la dómina. Nació'l 1 de Julio de 1906, nel barriu xixonés de La Calzada Alta, y nel equipu Club Calzada, xugó los sos primeros partíos de fútbol, al empar que practicaba pruebes de velocidá. Cuatro hermanos xugaron nel Club Calzada y amás Francisco oficialmente nel Sporting. Tres el so pasu pol Unión Deportivu Racing, llegó al Sporting, nel que, na temporada del so debú, 1926-27, participó en 14 partíos oficiales. Na viniente nun actuó, por mancadura, pero a partir d'entós, col club raxón xixonés en Segunda División, la so presencia foi siguida pos intervieno en 16 partíos de la campaña 1928-29; en 23 en 1929-30; en 17 en 1930-31; en 23 en 1931-32; en 29 en 1932-33; en 24 en 1933-34 y en cinco en 1934-35. En total vistió la camiseta raxona en 128 ocasiones. Na anterior a la Guerra Civil, xugó nel Racing de Mieres y, acabada la guerra, nel Oriamendi, onde amás foi'l so entrenador. Cumplíu l'añu de prórroga concedíu al Real Uviéu pa reincorporase a Lliga, pasó a esti club al reforzase colos trés miembros d'aquella mítica defensa del equipu de Xixón. Namá xugó ellí una temporada con una discreta intervención en cinco partíos en 1940-41, los únicos de la so vida deportiva en Primer División y cumplíos los 34 años, optó pola so retirada definitiva. Entrenó al desconocíu equipu xixonés de Moreda en 1950 y foi-y otorgada la Medaya al Méritu Deportivu Rexonal en 1961. Casóse con una hermana de los Herrera, así que foi cuñáu de “El Sabiu” y de Herrerita.

Santín

S. González “Santín” foi un xugador de la parte esquierda del campu, defensa o mediu, que xugó dos temporaes col Sporting. Na temporada 1925-26 fíxolo nel equipu xixonés del Fortuna. Fichó pol club raxón xixonés ya intervieno en trés partíos de la campaña 1926-27 y en dos en 1927-28. Establecióse en Logroño onde xugó munchos años col primer equipu de la ciudá hasta empiezos de los años 40 y del que foi entrenador na 1944-45.